Depýtattyń aıtýynsha, Roblox kún saıyn shamamen 150 mln adamdy jınaıdy. Platforma aýdıtorııasynyń basym bóligin kámeletke tolmaǵan balalar men jasóspirimder quraıdy. Osyǵan baılanysty ata-analar, muǵalimder jáne halyqaralyq sarapshylar alańdaýshylyq bildirip otyr.
«Vırtýaldy táýeldilik, agressıvti minez-qulyq, shynaıy ómirden alshaqtaý, jasyna saı kelmeıtin kontentpen baılanys sııaqty qaýipter baıqalady. Mundaı faktorlardyń balalardyń psıhologııalyq damýyna áseri uzaq merzimdi teris saldarǵa ákelýi múmkin», dep jazylǵan depýtattyq saýalda.
Shapaq Únzılániń aıtýynsha, mundaı ınternet alańdarda alaıaqtar men pedofılder de belsendi áreket etedi. Ol olardyń jumys tásilin erekshe atap ótti.
«Aldymen oıyn ishindegi vırtýaldy chat arqyly balanyń senimine kiredi. Keıin áńgimeni Telegram-ǵa kóshiredi, qupııa kezdesýge shaqyrady. Munyń sońy qaıǵyly jaǵdaımen aıaqtalýy múmkin. Alaıaqtar da osyǵan uqsas áreket etedi. Syılyq ýáde etip, keıin ata-ananyń bank kartasynyń nómirin jáne SMS arqyly kelgen kodty suraıdy», dep túsindirdi depýtat.
Halyq qalaýlysy kompanııanyń balalar úshin qaýipsiz orta qalyptastyrdyq degen málimdemesine qaramastan, naqty baqylaý múmkin emes ekenin alǵa tartty. Sebebi platformada sekýndyna 50 myńnan astam habarlama taraıdy.
Osyǵan baılanysty depýtat birqatar saýal joldady. Atap aıtqanda, Qazaqstanda Roblox-tyń balalar men jasóspirimderge áserine qatysty arnaıy zertteý júrgizilgen be. О́zge elderdiń tájirıbesin eskere otyryp, platformanyń jumysyn shekteý nemese qosymsha baqylaý tetikterin engizý qarastyryla ma. Sondaı-aq balalardyń ınternettegi qaýipsizdigin qamtamasyz etý úshin qandaı aldyn alý sharalary qabyldanyp jatqany jáne Ishki ister mınıstrligi men Bas prokýratýrada onlaın oıyn alańdary arqyly jasalǵan alaıaqtyq, bopsalaý nemese ózge de quqyqbuzýshylyq derekteri tirkelgen be? degen suraqtar qoıyldy.
Depýtattyń bul bastamasy ınternettegi balalar qaýipsizdigi máselesin qaıta kún tártibine shyǵaryp otyr.
Buǵan deıin maǵynasyz «memderge», onyń ishindegi beımazmun áýenderge qatysty el ishinde narazylyq týǵan edi. Ásirese, «Trallallero Trallalla» áýeni balanyń ǵana emes, eresek adamnyń da sanasyna keri áser etetini týraly dabyl qaǵyldy.
